Leuweung Ruksak, Cai Beak, Manusa Balangsak (1)

Baraya saalam dunya,
 Kaayaan leuweung di Tatar Sunda dina danget ieu kacida matak 
pikahariwangeunana. Numutkeun data anu aya (anu diragukeun), legana leuweung 
di TS teh masih nyesa kl. 791,512 ha atawa 22% tina legana sarakan Jabar 
sagemblengna (lsjs), sedengkeun nuturkeun data satelit, legana leuweung 
urang teh ukur nyesa 9% ti lsjs. Padahal, Perda ngeunaan tata ruang Jabar 
geus nangtukeun yen legana leuweung di Jabar kuduna 45% tina lsjs. Ebreh ka 
urang sarerea, kumaha hapana (B.Ind: mandulnya) ieu aturan tata ruang di 
Jabar. Atawa, karuksakan bin alih fungsi leuweung diantep bae, henteu 
dipalire. Hal ieu kacida bahayana, sabab leuweung teh sarua jeung sumber 
kahiripan. Ceuk DPLKTS (Dewan Pemerhati Lingkungan dan Kehutanan Tatar 
Sunda) tea mah: "Leuweung Ruksak, Cai Beak, Manusa Balangsak" ("No Forest, 
No Water, No Feature"). 
 Kasadaran kana ajen leuweung anu ebreh dina jargon "Leuweung Ruksak, Cai 
Beak, Manusa Balangsak (tina "No Forest, No Water, No Feature"), di TS 
satemenna geus diingetkeun ku luluhur urang sarerea ti beh ditu keneh. 
Sanghiyang Siksa Kandang Ng Karesian (SSKNK) , naskah kuno Sunda anu ditulis 
dina jero kl abad 15 M (Jaman Pajajaran, Sri Baduga Maharaja) geus 
netelakeun konsep Kabuyutan, anu dina jero ieu Kabuyutan teh, sakumaha ceuk 
parasasti Citatih, kl abad 10 M, ngawengku oge leuweung. Dina SSKNK 
disebutkeun, yen sing saha bae putera raja (ayeuna mah: pamarentah jeung 
sakabeh masyarakat) anu henteu bisa miara Kabuyutan eta leuwih hina 
tinimbang kulit lasun (sabangsa careuh/musang) anu aya dina jarian (tempat 
runtah)". Cutatan tina SSKNK jeung prasasti-prasasti ngeunaan kabuyutan geus 
mindeng pisan dipedar di ieu milist. Alhamdulillah, sanajan karuksakan 
leuweung Jabar ayeuna geus sakitu pikamelangeunana, dangiang karuhun anu 
sakitu geus iatna ngeunaan perluna miara leuweung ayeuna siga anu nitis, 
minimal ka sagolongan inohong, nonoman, jeung masyarakat US. 
 Nyanghareupan kaayaan leuweung urang anu sarupa kitu, US henteu cicingeun. 
Geus ti simet 5 taunan katukang, sagolongan inohong-inohong US anu sadar 
kana bahayana kahirupan upama leuweung urang beak geus bajoang ngagunakeun 
sagala cara anu halal pikeun malikkeun deui kaayaan leuweung urang. Anu jadi 
udagan, luyu jeung aturan tata ruang, nya sakurang-kurangna ngawujudkeun 
cita-cita: leuweung Jabar (dina wangun kawasan lindung) kudu aya saeutikna 
45% tina lsjs (kusabab kitu kaharti upama ieu kelompok nyebutkeun dirina 
salaku kelomok kawasan lindung 45% disingget: KL 45). Ieu bajoangan teh 
danget ieu geus nepi kana ngararancang draft Perda Jabar ngeunaan KL 45% anu 
dijerona ngandung konsep-konsep ngokolakeun leuweung nuturkeun budaya lokal. 

 Bajoangna KL 45 lumayan meunang pangrojong anu gede ti masyarakat jeung 
"sabagean" pamarentahan. Ti masyarakat, rupa-rupa LSM kasundaan (upamana 
bae: Gerakan Pemuda Pajajaran, Bandung Spirit, DPLKTS,
Sundanet.com/KUSnet<http://Sundanet.com/KUSnet>,
jrrd), asosiasi-asiasi pecinta lingkungan, pausahaan widang pariwisata, 
jeung koperasi-koperasi anu ngokolakeun leuweung. Ti pamarentahan anu 
kalintang bentes ngabela KL 45 ieu nyaeta: BPLHD (utamana, kersana Kang Iwan 
Wangsaatmaja + Kang Ade Suhanda). Sababaraha panalungtikan naskah akademik 
ngeunaan leuweung, tutuwuhan jeung kahirupan anu gumantung kana leuweung 
ceuk budaya TS lumayan geus dihasilkeun ku ieu kelompok. Draft Perda Kawasan 
Lindung anu jadi tandingan Perda sarupa versi pamarentah anu bisa jadi hiji 
preseden hade ngeunaan Perda anu dirumuskeun ku masyarakat, danget ieu ampir 
rampung jeung keur aya dina hambalan gogodogan anu akhir. Akhir Juli taun 
ieu dipiharep ieu Perda rumusan KL 45 geus bisa disosialisasikeun.
 Cag heula. Kahareup muga pareng ngaguar raft Perda KL versi KL 45 keur 
bahan sosialisasikeuneun. Anu jadi panggero, taya lian ti neda pangrojong ti 
sadayana, sangkan ieu Perda jeung "action" saterusna dina raraga ngahontal 
KL 45%, jembarna kajagana kabuyutan urang anu mangrupa leuweung bisa 
kawujudkeun. Teu aya sanes, sangkan ulah kajadian: leuweung ruksak, cai 
beak, manusa balangsak.
 Baktos,
manAR


[Non-text portions of this message have been removed]



Ti urang, nu urang, ku urang jeung keur urang balarea